Тэрмін ліквідацыі збою, у выніку якога ў некаторых кліентаў трох беларускіх банкаў абнуліліся рахункі, некалькі разоў пераносілі.
Раніцай працэсінгавы цэнтар запэўніў, што ўсе балянсы на картках ААТ «ААБ Беларусбанк», ААТ «Белаграпрамбанк» і ААТ «Белінвестбанк» прыведзеныя ў актуальны стан:
«Апэрацыі з выкарыстаньнем картак ажыцьцяўляюцца ў штатным рэжыме».
Аднак многія людзі ў камэнтарах да гэтага паведамленьня пішуць, што грошы ім так не вярнулі або што зьявіліся новыя праблемы.
Камэнтары да паведамленьня Банкаўскага працэсінгавага цэнтру
Пазьней Банкаўскі працэсінгавы цэнтар заявіў, што калі ў кліентаў банкаў узьніклі сумневы ў актуальнасьці астачы на банкаўскай платнай картцы, трэба зьвяртацца па тлумачэньні ў банк, які выдаў картку:
«Зьвяртаем вашу ўвагу на тое, што неадпаведнасьць астачы, у тым ліку і адмоўная астача, можа ўзьнікнуць з прычынаў, не зьвязаных з узьніклым збоем, напрыклад, у выніку апрацоўкі валютна-абменных апэрацыйяў наяўнасьці зваротаў і іншых прычынах».
Пакуль няма афіцыйнага тлумачэньня, з чым зьвязаны гэты збой.
ГЛЯДЗІЦЕ ТАКСАМА: У кліентаў трох беларускіх банкаў абнуліліся рахункі, тэхнічны збой абяцаюць выправіць да канца дня